Øy og kyrkje (Gimsøy). Norr. Gimista f, eit gammalt øynamn som ikkje er sikkert tolka. Mest truleg er det kanskje at det er laga med avleiingsendinga -ist og at stomnen er skyld med den ein har i → Gimsan. H. Christiansen (MM 1933 s. 61-62) har gissa på at namnet går tilbake på eldre *Gimvista, der førsteleddet er skyld med norr. gymbr f ‘gimber, ungsau’, sisteleddet norr. vist f ‘stad der ein oppheld seg’ (→ Vist), altså ‘sauøya’. Nils Hallan har (i Norsk Lingvistisk Tidsskrift 2/1987 s. 61) tenkt seg ei norr. opphavsform *gimi-visti med tydinga ‘vinterstaden, vinterlandet’ (gimi til urgerm *gim- ‘vinter’, jf. latin hiems.) JS