Hafrsfjord eller Hafrsfjorden. Magnus Olsen (NG X s. 183) trur førsteleddet er norr. hafr m ‘bukk’, kanskje brukt om eit skjer i det smale innlaupet til H., tidlegare kalla Prestaskjeret. Husdyrnamn, t.d. → Galten, Oksen, er nokså vanleg om farlege skjer i skipsleia. Kanskje hafr i H. helst siktar til ein farleg grunne ved eitt av skjera i fjordkjeften. I så fall synest Habboen [hab`bo:en, hafs`-], vel norr. *Hafrboðinn, ein båe sør for → Feisteinen, vera ei liknande namnelaging. H. finst òg som fjordnamn på Island, der ein trur at førsteleddet er persontilnamnet Hafr.

   H. er kjent for å vera staden der Harald Hårfagre ca. år 900 heldt det avgjerande sjøslaget under rikssamlingsstriden. Denne historiske tradisjonen må vera årsak til at H. har fått ein så arkaisk skrivemåte.

Litt.: Hovda 1941 s. 13-14. F. Jonsson i NoB 1916 s. 74. Særheim 2011 s. 5-8 i M. Nitter (red.), Tverrfaglige perspektiver 2. Arkeologisk museum Stavanger. OS